باغرینه قان ائتمه!

((مجنونا دئین یوخدور: ای عاشیقِ بیچاره
لیلی له نه کارین وار، قویسون سنی آواره))؟
عشق عالمی عشاقه بیر وادیِ محنتدیر
فرهادی سالوب داغه، منصوری چکوب داره
پایانِ غمِ عشقی تفسیره نه حاجت وار
گؤر، بیر نئجه پروانه شؤق ایله یانار ناره؟
دنیا او قدر لیلی، مجنون یئتیروبدورکی
سایسان، نه قدر گو گده وار ثابت و سیّاره
هر لاله رخ عشقینده اؤز باغرینی قان ائتمه!
هر دردی چکیر بولبول، گول قسمت اولار خاره
بی مهر گؤزللردن عالمده وفا اوُمما
مئیلین سالاجاق بونلار آخر یئنه اغیاره
واحد! بیز اؤلوب گئتدیک، مهرایله،محبتله
دونیا دؤنه جک بیر گون بیر صحنه ٔ گلزاره!