یالوارما

کؤنول، وفاسیز اولان نازلی یاره یالوارما
نه اعتبار اولا، بی اعتباره یالوارما!
داریخما، یاخشی یامان روزگاریمیز کئجه جک
بو بئش گون عؤمره گؤره روزگاره یالوارما!
سنین ده بیر گون اولار نوبهارین، ای بولبول
بو ذؤقسوز، بو صفاسیز باهاره یالوارما!(١)
دوشنده موشگوله، بیر اهلِ حاله دردین دیٔ
علاجین اوندادیر، اوندان کناره یالوارما!
فقیره، عاجیزه، مظلومه، احترام ائیله
عدویه، قان ایچنه، ظلمکاره یالوارما!
وطن یولوندا اؤلوم مرد اوچون سعادتدیر
حیات اوچون فلکِ کج مداره یالوارما!
مخالف اهلینه باش ا گمه، سن ده منصور اول
(اناالحق) اوسته چکیلسنده داره، یالوارما!
نه اولدو دؤولت جمشید، مولک اسکندر؟(٢)
نه تاجیره، نه ده بیر شهریاره یالوارما!
اگر حیاتینی، واحد، خوش ائتمک ایسترسن
نه گول جفاسینی چک، نه ده خارا یالوارما!

مصرع بو شکلیده ده قئید اولموشدور:
١ خزان جفا سینا صبر ائیله، خاره یالوارما.
٢ محبت اهلینه، واحد، همیشه خدمت ائله.