عار قیل

کمال و علمی خوشلاما جوانسان اوغلوم عار قیل
بوراخ بو راه مکتبی جهالتی شعار قیل!
اماندر اولما ناخلف توتوب ره جهالتی
منیم تک آد قازانگیلن بو روزه وئر شجاعتی
چکینمه جور و ظلمدن دئمه که وار قباحتی
ئوزونه راغب ائتگیلن هراسیندن جماعتی
ووروب. یخ ئولدر عالمی هنر لر آشکار قیل
ئولورمی علمدن گورک زمانه ده ثمر اوغول؟
قیلیب می علم بیر کسی جهاندا بختور اوغول؟
اینانما خیری وار سنه تمامیدر هدر اوغول
عبثدر وئرمه کندینه(١) بو قدر دردسر اوغول
گورنده علمی مکتبی دایانما تئز فرار قیل
بوراخ طریق مکتبی یوگورمه راه صنعته
چالیش که سالما باشینی بلا و درد و محنته
مجازایله دولانگیلن باخان هانی حقیقته
همیشه غالب اولگیلن جهاندا قتل و غارته
اذیت ائیله خلقینه جفای بیشمار قیل
فقیره تهمت ائیله مک همیشه اولسون عادتین
بیر ائیله ظالم اول سال جهاندا لرزه شهرتین
وور ئولدور آرتا گون بگون خلایق ایچره حرمتین
غم ائتمه اولسادا اگر اسیر غیره ملّتین
همیشه مسلکین کیمی بو خلقی تار و مار قیل

١ کندینه یعنی ئوزونه. بو لغت ترکیه لغتی در.