منو
پروانه دن ـ پروانه یه
سئوگیلیم، عکسین دوشوب پیمانه یه
آرتیریبدیر ذؤقومو میخانه دن – میخانه یه
لیلی نین دیوانه سی مجنون اولوبدور، من سنین
فرق قویا عاقیل گرک دیوانه دن – دیوانه یه
شمع ایله پروانه یاندی، من جمال یار ایله
بیر تفاوت قویمالی پروانه دن – پروانه یه
سؤیله نیر دیللرده چوخ عاشیقلرین افسانه سی
دوشمه‌میشدیر من کیمی افسانه دن – افسانه یه
یوسیفی گؤسترمک ایستردی زولیخا عالمه
چوخ گؤزللر توپلادی کاشانه دن – کاشانه یه
کعبه دن بوت خانه نی هرگز آییرماز حاق پرست
عشقدیر یول گؤسترن جانانه دن – جانانه یه
تاپمادی، واحد، هله هئچ کس بو خطین صاحبین
((قالدی بو دونیا ائوی دیوانه دن – دیوانه یه))