بیزیم اولسون

سئوگیلیم، بو باغدا بیز باغبانیق
بو گول، بو لاله زار، قوی بیزیم اولسون!
اؤزوموز ذؤق آلاق گوللریمیزدن
بو گولشن، بو باهار، قوی بیزیم اولسون!
بو ائللر باغیدیر، ایندی بیز گرک
هامیمیز بیر یئرده ا کیب بئجه رک
اذن وئر، بو باغدان بیزده گول درک
صفالی روزگار، قوی بیزیم اولسون!
هامی نین پایی وار آنا وطنده
تک دوُرما گل قوشول بیزیمله سن ده
بولبول تک سسله شک باغدا، چمنده
طبیعتده نه وار، قوی بیزیم اولسون!
دئمیشلر بو سؤزو بیزدن قوجالار
ائلیندن آیریلان چوخ تئز قوجالار
باریلا هر آغاج آرتار، اوجالار
شاد ائللر، شن دیللر، قوی بیزیم اولسون!
دونیا ائللرینین بختیاری ییق
صلحون، عدالتین بایراقداری ییق
مظلوم انسانلارین طرفداری ییق
صداقت، اعتبار، قوی بیزیم اولسون!
من کی آییرمیرام ائلدن اؤزومو
تیکمیشم خلقیمه ایکی گؤزومو
واحدم، سئوگیلیم، بو بیر سؤزومو
ساخلایاق یادگار، قوی بیزیم اولسون!