منو
شانه دولانسین!
زولفینده نه لازم، گؤزلیم، شانه دولانسین؟
قویما او حرمخانه نی بیگانه دولانسین!
عیب ائیله‌مه، کویوندا دولانسام گئجه گوندوز
شمعین گرک اطرافینا پروانه دولانسین
ساقی! دولانیم باشینا، مئی جامینی گزدیر
سرمست اولوم، باشیما مئیخانه دولانسین
اول زولفه کؤنول وئرمه، دئییرلر منه، ال چک(١)
اونسوز نئجه بس بودلِ دیوانه دولانسین؟
مجنون نه برابر منه! صحرالارا قاچدی
عشق اهلی اودور، عرصه ده مردانه دولانسین!
اغیارایله اؤز یارینی همدم گؤره ن عاشیق!
دوشسون او گرک دشت و بیابانه دولانسین!
سرخوشلق ایله عؤمرونی صرف ائیله‌مه، واحد!
عارف اونا دئرلر کی، حکیمانه دولانسین(٢)
مصرع بو شکلیده ده قئید اولموشدور:
١اول زولفه کؤنول وئرمه، دئییرلر منه، امّا.
٢عارف اونا دئرلر کی، ادیبانه دولانسین.