منو
کؤنلوم قوشو فغانه گلیر!
فدا اولوم سنه، ای یوسیفِ زمانه بالام
کی، گلمه‌ییب دخی میثلین سنین جهانه، بالام
اؤلونجه اوزمرم ال سندن، ای وفا کانی
بو قدر عاشیقیوی چکمه امتحانه، بالام
نه مدت ایدی سنین حسرتم جمالینا من
اولوبدور سئیرِ سرشکیم اوزه روانه، بالام
بو فانی دهرده، بالله، منِ فلک زده نی
بلاخدنگینه سن ائتمیسن نشانه، بالام
گؤرنده خالینی کؤنلوم قوشو فغانه گلیر
نئجه کی، ناله ائدیر قوش گؤرنده دانه،بالام
ا گر چی جانیمی آلماقدی خواهیشین، سؤیله
بو سیرّی ساخلاما پنهان، گتیر بیانه، بالام
اسیر زولفون اولاندان شکسته دیر واحد
گلیر فغانه، ائدیر قوش کیمی ترانه، بالام