منو
اینجتمه منی!
فرقتیندیر، سنین، ای مه، گتیره ن جانه منی
سالان آواره جنون تک بو بیابانه منی
آغلارام راهِ فراقیندا سنین شام و سحر
سنین عشقیندیر ائدن، بیل گیلن، دیوانه منی
رحمه گل، رحم ائله، اینجتمه منی، عاشیقینم
اؤلدوره ر، آخیری بو طعنهٔ بیگانه منی
بند اولوب مرغِ دلیم زولفِ سیاهینده سنین
آلدی آرامیمی گؤر، سالدی نه هیجرانه منی!
طاق ابرولارینین سجده سین ائتدیکده عجب
دسترس ائیله‌دی معجزایله ایمانه منی
واحدا، ائتمه شکایت دخی مهوشلردن
توش ائدن بختدی بو دردِ فراوانه منی