منو
درده درمان ایسته رم!
من همیشه یاریمین زولفون پریشان ایسترم
آغ اوزونده قارا خالین، چونکی پنهان ایسترم
ایسترم، زولفو اوزونه دوشسون، اولسون سایبان
گؤرمه سین اغیارِ بد خوی، روی جانان ایسترم
دور کناریمدا، نیگارا، قیل تماشا عاشیقه
بیر مریض بی علاجم، درده درمان ایسترم
زاهیدِ کم عقله باخ، وصف ائیله ییر قیمان و حور
نئیلرم قیلمان و حوری، وصلِ خوبان ایسترم
واحدا، یوخدور سنین تک خوار اولان ایامدا
ایندی کی، یوخدور علاجین، سؤیله هیجران ایسترم