هیلال ائتدی منی!

بیر قلم قاشلی نیگارین غمی لال ائتدی منی
خم قیلیب قدّیمی، مانندِ هیلال ائتدی منی
ائدیرم بسکی خیالین بو قارا گؤزلولرین
بو خیال آخیری مبهوتِ خیال ائتدی منی
اشک گولگونوم ایله چهرهٔ رزدیم بویانیب
قانا دونموش بو گؤزوم مردمی آل ائتدی منی
کیمه یئتدیمسه، لبین سرّنین سوردوم اوندان
خلق آراسیندا عجب اهلِ سؤال ائتدی منی
بستهٔ زولفو اولاندان بری اول ماه وشین
چرخِ سرگشته و بی صبرِ جمال ائتدی منی
آذرا(١) اولمادی بیر کیمسه، سورا حالِ دلیم
چون فلک غرقهٔ گردابَ ملال ائتدی منی
ائوی آباد اولا عالمده یئنه ممتازین(٢)
سوردو احوالیمی، فرخندهٔ حال ائتدی منی
منه بخشایشی اولدو او کرم صاحبی نین
اؤیله کیم، صاحبِ پر جاه و جلال ائتدی منی
دیلرم، بیر سنون احسانینی عالمده گؤروم
آرزو صاحبی بیر فیکرِ محال ائتدی منی
واحدا! گرچی حقیرم، ولی چوخدور قدریم
نولا گر چرخ دخی اهلِ سؤال ائتدی منی

١شاعیر آذر. ٢ادبیات شناس، سلمان ممتاز عسگراوف.