قوچو

بیر قوچوایدیم، چوخدو قاباق حؤرمتیم
خالقی دؤیوب سؤیمک ایدی صنعتیم
ایندی قالیباورگیمده حسرتیم
اؤلدوره بیلمیرم دؤ یه بیلمیرم
هئچ کسی اینجیدیب سؤیه بیلمیرم
اینجیدردیم قاباق بنّا فعله نی
گتیرمیشدیم تنگه بوتون محله نی
ایندی دؤیوب، سؤیور هر یئتن منی
اؤلدوره بیلمیرم دؤ یه بیلمیرم
هئچ کسی اینجیدیب سؤیه بیلمیرم
او گوندن کی، شهره دوشوب انقلاب
بو غصه دن باغریم اولوبدر کاباب
کؤرپه لرده منه قایتاریر جواب
اؤلدوره بیلمیرم دؤ یه بیلمیرم
هئچ کسی اینجیدیب سؤیه بیلمیرم
اسردی قونشولار گلنده آدیم
بیرکیشی دن یوخ ایدی قورخوم زادیم
ایندی به گنمیری منی اؤز آروادیم
اؤلدوره بیلمیرم دؤ یه بیلمیرم
هئچ کسی اینجیدیب سؤیه بیلمیرم
بوندان ازل قوچاقدیم فرهاد کیمی
کسدیره ردیم تینلری جلاد کیمی
گیرمیشم ایندی ائوه آرواد کیمی
اؤلدوره بیلمیرم دؤ یه بیلمیرم
هئچ کسی اینجیدیب سؤیه بیلمیرم