منو
مریض عشق!
گؤره ن محرابِ قاشین ایسته مز طاقِ کلیسانی
شکست ائتمیشدیر حُسنون مُصحفی، انجیل عیسی نی
بو قدری کیم تؤ کورسن بینوا عاشیقلرین قانین
حلال اولموش مگر دینینده بو عاشیقلرین قانی؟
گؤرئیدی حُسنونو گر پیرِ کنعان بو وجاهتده
فراموش ائیلر ایدی یوسیفین، ای یوسفِ ثانی
قیام ائتدیکده قدّین، مین قیامتلر اولور برپا
نه قامتدیر بو، جانا، مات ائدیب گبر و مسلمانی
مزاقِ اهلِ ذؤقو فهم قیلماز هئچ قال اهلی
نه بیلسین زاهیدِ بی ذؤق، قدرِ عشقِ جانانی
طلانین قدرینی زرگر بیلر، بیلمز کی، آهنگر
مریضِ عشق اولان دایم دیلر دردینه، درمانی
شکایت ائیله‌مه، واحد، جاهاندا یاردان هرگز
گرک عشاقلری معشوقونون اولسون دا قوربانی