منو
گؤهر اشعار
گؤرسم ای گول اؤلرم بیرده سنی خار ایله
اوّل اؤلدور منی کئت سونرا گز اغیاریله
عهد قیلدین کی، وفاسیزلیقی ترک ائیله یه سن
وارسان، احسن سنه ئوز ائتدیگین اقرار ایله
سونبولِ زولفونه چوخدان وورولوب باد صبا
گئجه گوندوز گئچیریر عؤمرونو گولزار ایله
تاپمامیشدور حله بولبول سنه بنزر بیر گول
باغدان باغا گزیر دیدهٔ خونبار ایله
قامتین سروی، گؤزون نرگیسی گؤزدن سالدی
دهنین غنچه نی لال ائیله‌دی گفتار ایله
دل گؤزون فکرینه چوخ دوشدو، خیال ائیله‌مه‌دی
راحت اولماز قوشولان مست خطا کار ایله
دؤلتیم سیم و زریم اولماسا، واحد، خوشدور
گنج طبعیم دولودر گؤهر اشعار ایله