کج نیگاه!

هر کس جاهاندا دوست اولا بیر خئیر خواه ایله
کئچمز حیاتی ناله و فریاد و آه ایله
کؤنلوم گول اوزلو بیر گؤزلین مبتلاسیدیر
هر گز دگیشمرم من اونو مهر و ماه ایله
کویِ نگاریمین من ازلدن گداسییام
بحث ائیلرم بو رتبه مله پادشاه ایله
دشت ختادا سئیر ائدن آهویه وئرمرم
اول نازنین باخاندا منه کج نیگاه ایله
یارین جفاسی اولماسا بیچاره عاشیقه
صحرای عشق دولمازایدی اشک و آه ایله
واحد، بو نازنین لره چوخ بیوفا دئدیک
تانری باغیشلاماز بیزی بؤیله گناه ایله