گؤزل تربیه قیمتلی بزهکدیر

عالم دئییر، ایستکلین عجب نازلی ملک دیر
هر شیوه سی مین حیله دیر، هر نازی کلک دیر
هر کس کی یئنه مئیوه سین ایسترسه باهارین
باخسین بو گؤزل دلبره خالص چییه لک دیر
سؤز وئردی نیگاریم منی اینجیتمه یه بیرده
تئز دؤندو سؤزوندن، بو آچیق دببه لمک دیر
اؤز یارین ایله کوسلوده اولسان، باریشارسان
اوزگه سینه بئل باغلاما، بیجدیر، دوبلک دیر
بعضاً دئمه ائولرده دئیینگن کیشیلر وار
واردیر ائله آروادکی، اریندن ده گنک دیر
قیسقانجلیق ائدن عایله نین قیسمتی، آنجاق
ار آروادی، آرواد اری، تحقیر ائله مک دیر
قیمتلی بزه کله قادینین زینتی آرتماز
اؤلادا گؤزل تربیه قیمتلی بزک دیر
واحد، چالیش، اطرافینی اینجیتمه اؤزوندن
جهد ائت، ائله سؤز یازکی، او سؤز خالقا گرک دیر