هنریم وار

ای گول، منه هر جؤر ائله ییر سن، خبریم وار
بیر گون یاخار آخیر سنی آهیم، زهریم وار
لیلی نه چیدیر، حُسنون ایله بحث ائده بیلسین
مجنون نه دیر، اوندان منیم آرتیق هنریم وار!
گؤرجک منی، مین ناز ایله گیزلتمه جمالین
پیس گؤز سنه دگمز، گؤزلیم، خوش نظریم وار
عالم ییغیلا، دردیمی میندن بیری بیلمز
زولفون هوسیله او قدر درد سریم وار
هیند اهلینه گؤستر، گؤزلیم، چشمله زولفون
فخر ائتمه سین آهویِ ختن، مشکِ تریم وار
جانانلا مئی ایچدیکده رقیبین گؤزو چیخدی
اود توتدو، آلیشدی، اونا بیلدی، ضرریم وار
سلطانلارا باش ا گمرم، هرچند فقیرم
خوشدور منه، سن تک، گؤزلیم، تاجِ سریم وار
واحد، هله آز یازمیسان اؤولادِ وطن چین
چوخ یئرده گئدیب لووغالانیرسان، اثریم وار