منو
آغ اوسته قارا
کئچدی مین نازیله اول دلبرِ مهپاره بئله
بیرده دؤنسه، ووراجاق سینه مه یوز یاره بئله
اینجیمه، عاشیقه جؤر ائیله سه، بیگانه یه ناز
او گولون بولبوله نازی بئله دیر، خاره بئله
ذؤقوم آرتیر، اوزو گویچکلره دوشدوکجه یاخین
هله پروانه اؤزون وورمامیش اودلاره بئله
هر کیمه سؤیله‌دیم عشقینده اسیر اولدوغومو
دئدی: کیم سالدی بو درده سنی، بیچاره،بئله
گؤزومون یاشینی کویوندا گؤره نلر دئدیلر:
سئوگیلیم تک نه گول اولماز، نه ده فواره بئله
دئدیم، آغ اوسته نه نوعی گؤرونور قاره؟ او مه
تؤ کدو زولفون اوزه، آغ اوسته، دئدی، قاره بئله
واحد، هر کیمسه ده کی عشق، محبت یوخدور
آلمارام من اونو بیر درهم و دیناره بئله