بیلدین می؟

کئچن شب، نور اییله، کؤنلوم پریشان اولدو، بیلدین می؟
منه وصلِ نیگاریم دؤندو هیجران اولدو، بیلدین می؟
شرابِ ناب کی، جانان ایله بیر یئرده ایچمیشیدیم
گؤزومدن گلدی، باغریم دؤندو آل قان اولدو، بیلدین می؟
سیز اؤز معشوقه نیزله شاد و خرّم، عیش و عشرتده
منیم غم ایچره کؤنلوم مولکِ ویران اولدو، بیلدین می؟
منه سؤز وئردی، اؤلدورسون، قورتارسین دردِ فرقتدن
سؤزوندن اول جفا پیشه پئشیمان اولدو، بیلدین می؟
دئمیشدیم، کویونا اول بیوفانین گئتمه ییم بیرده
حقیقت بؤیله بیر عهد ایله پیمان اولدو، بیلدین می؟
وفاسیز، رحم سیز بو تللر اسیری اولدوق آخیرده
جاهان عشق اهلینه گئتدیکجه زندان اولدو، بیلدین می؟
بو انصافسیز گؤزللردن اذیّتلر چکن واحد
سنه قوربان اولوم، خاک ایله یکسان اولدو، بیلدین می؟