منو
سامانلاسین
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین
ترک اولا بوندان بئله مهر و محبت گرک
ساخلایالیم دهریده جانی سلامت گرک
ائیلیه لیم جمله میز ترک تجارت گرک
جهله طرف گئدمگه ائلییک عادت گرک
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین
جمله وئریب ال اله غیرییه امداد ائدک
سعی قلیب روز و شب دهریده بیر آد ائدک
مکتب و شورب و قمار جهد ائدیب ایجاد ائدک
بلکه غم و غصه دن گونلوموزی شاد ائدک
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین
محو اولا تئزلیکله بو حال پریشانیمیز
همت ائدک قالمایا ذرّه جه نقصانیمیز
ذلت ایله چخمایا حسرت ایله جانیمیز
قویمایوز الدن گئده شوکت ایله شأنیمیز
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین
دمدر آچا اویقودان چشمینی خورد و کبار
اولما لییق جمله میز ملته خدمتگذار
دلبر اوچون ائیله یک عشق ایله جانلار نثار
مسجد و منبرلری ائیلییه لیم تار و مار
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین
کئیف ایله بیگانه‌لر جمله اولوب بختور
سعی ائده ریک حیف بیز هر ایشه شام وسحر
ائیلمز اصلا بیزه نالهٔ مظلوم اثر
ایستمه ریک غیریدن عبرت آلاق مختصر
گلدی بایرامی امیر ایشلری سامانلاسین
فرصت ایکن هر کیشی ئوز ایشینی آنلاسین