اهلِ کمالیم وار منیم!

گل، گؤر، ای بولبول، بو گولشنده نه حالیم وار منیم
بیر گولِ رعنایه بند اولماق خیالیم وار منیم
من نئجه عشق عالمینده ال چکیم، صبر ایله ییم
ناز ایله مین جان آلان بیر مه جمالیم وار منیم
عاشیقه ناز ائیله ییر، نئیچین رقیبه یار اولور؟
یاریما یئتسه الیم، اوندان سوالیم وار منیم
روزگاریم قوی قارالسین او قارا زولفون کیمی
فخر ائدیب من ده دئییم، جاه و جلالیم وار منیم
چوخ دا یوسیف اؤز زولیخاسین گؤروب فخر ائتمه سین
قوی گلیب گؤرسون نئچه قاشی هیلالیم وار منیم
واحدا، فخرله هر گون سؤیله سن اؤز یارینا:
سئوگیلی، ایستکلی بیر اهل کمالیم وار منیم