پریشان اولا خوشدور

یارین رهِ عشقینده کؤنول قان اولا، خوشدور
هیجرینده گؤزوم هر گئجه گریان اولا، خوشدور
من کی، بو قارا گؤزلولر عشقینده اسیرم
سینه م هدفِ ناوکِ مشگان اولا، خوشدور
سن عصریمیزین ایندی زولیخاسیسان، ای گول!
عاشیق سنه مین یوسفِ کنعان اولا، خوشدور
ییغما باشینا، ناز ایله بیر شانه چک هردن
کؤنلوم کیمی زولفون ده پریشان اولا، خوشدور
گل سینه وی گؤستر منه هر صبح زامانی
گول بولبول اوچون چاکِ گریبان اولا، خوشدور
روخسارون اودو کؤنلومو یاخدیقجا سئویننم
پروانه یوز ایل شمع ایله سوزان اولا، خوشدور(١)
جانان نه جفا ایله سه، واحد، یئنه صبر ائت
عشق اهلی اسیرِ غمِ جانان اولا، خوشدور

١مصرع بو شکلیده ده قئید اولموشدور:
پروانه اوچون شعلهٔ سوزان اولا، خوشدور