اوجال ملکیم

قادینلا یوکسه لجک شأنی آذرستانین
اولورسا تربیه اوغروندا سعی نسوانین
بشر ترقی ائدر تربیتله دنیاده
فنادیر عاقبتی تربیتسیز انسانین
قایندان آسلیدر اطفاله تربیت وئرمک
بونی طلب ائله یر اقتضاسی دورانین
چالیش بو تربیت اوغروندا مرد ایگیتلرتک
باخیب شفقتینه عالم اولسون حیرانین
چکیلدی پردهٔ ظلمت یخلدی اهل نفاق
یاییلدی عالمه گون تک ضیاسی عرفانین
گوتور او پرده نی اوزدن جهانی روشن قیل
بنائی ظلمتی یخ، آچ عذاری تابانین
شرفله عمرونی صرف ائد معارف اوغروندا
گوزه تله عزت نفسین اونوتما وجدانین
اوجال اوجال ملکیم یوکسه لیر سنینله حیات
اوجال که یوکسه له عالمده شهرت و شأنین