منو
ائشیتدیگیمه گؤره!
دلبریم یار اولوب اغیاره ائشیتدیگمه گؤره
گول گئدیب همدم اولوب خاره ائشیتدیگمه گؤره
بو قارا گؤزلولرین عشقینه هر کیم دوشسه
زولف الیله چکیلر داره ائشیتدیگمه گؤره
دوزمه‌دی جؤرونه مجنون بو پری چهره لرین
قاچدی صحرالره بیچاره ائشیتدیگمه گؤره
هوسِ سلسلهٔ عشقه دوشن عاشیقلر
باغلانیر طرهٔ طراره ائشیتدیگمه گؤره
ییخما، ای گول، نظریندن دوشن عاشیقلرینی
تئز دوشر توپراقا. فواره. ائشیتدیگمه گؤره
گؤزلرین خسته سیم، گل بیر اؤپوم لعلیندن
مئی وئرر صحّتی بیماره ائشیتدیگمه گؤره
یار ا گر اولماسا، واحد مئی ناب ایچمه یه جک
آند ایچیب بادهٔ گولناره ائشیتدیگمه گؤره