باغریم اولدو قان، گلیرم!

بیر آزدا صبر ائله، ای یارِ مهربان، گلیرم
سنین یولوندا فدادیر بو جسم و جان، گلیرم
وفالی بولبولونم، حسرتِ جمالین ایله
چمن چیچک لری تک باغریم اولدو قان، گلیرم
ا گر چی محنتِ هیجرینله اود توتوب یانیرام
نه غم کی، شؤقِ وصال ایله شادمان، گلیرم
یوز ایل گر آیری دوشه ک، خاطریمده سن، گؤزلیم
صداقتیمله منی ائیله امتحان، گلیرم
منه تسلی وئره ن بیر سنین خیالین دیر
بیر اؤزگه دلبره حالیم دئییل بیان، گلیرم
ا گر بهشت اولا غربت، یئنه جهنم دیر
وطن محبتی وئرمیر منه آمان، گلیرم
منیم بو حالیمی، واحد، نیگاره تئز یئتیرین
اونوتماسین منی اول یارِ مهربان، گلیرم