چوخ یالواردیم!

دئدیم اغیارایله گزمه، سنه چوخ یالواردیم
ایندی دینجه ل گؤزلیم، من ده اؤلوب قورتاردیم
بیر صداقت لی گؤزل، تاپمادیم عالمده، غرض
بو آز عؤمرومده چوخ اطرافی گه زیب آختاردیم
جان هانی منده؟ منی عشقدیر، ایندی یاشادان
اونو جانان، منه وئرمیشدی، یئنه قایتاردیم
کؤنلوم آلداتدی منی حُسنونه مه پاره لرین
سانمایین من، بو وفاسیزلارا، بئل باغلاردیم
فلکین قددی بو کولموشسه، من اوندان قوجایام
اوندا کی، یوخدو نه دونیا، نه فلک، من واردیم!
سنی من، ایسته دیگیم گونلر، اؤلوردوم سنسیز
عشقمین سرّینی کؤنلومده نهان ساخلاردیم
واحدم، عشقده من ایندی ده ثابت قده مه م
وارام ئوز یاریم ایله من نئجه اوّل واردیم