منو
جنت دئیرم آذربایجانا!
خوشدور منه، زولفونده گزن شانه من اولسام!
اؤلمزدیم، او زنجیرده دیوانه من اولسام!
اؤز شؤقوم ایله عارضِ جاناندا یاناردیم
عشق عالمی نین شمعینه پروانه من اولسام!
نذر ایله‌میشم، حؤرمت ائدم پیرِ مغانه
گر قسمت اولا، خادم میخانه من اولسام!
واعظ هله گولزارِ وطن شؤقونو بیلمز
بیر سون قویارام روضهٔ رضوانه، من اولسام
اؤز یوردوموزون گوللرینین عاشیقی ییک بیز
باخمازدیم، اینان، باشقا گولوستانه، من اولسام
کؤنلوم منی غرق ائیله‌دی بحرِ غمِ عشقه
بیر نوع چیخاردیم یئنه بیر یانه، من اولسام
عاشیقلر اوچون بیر یئنی دونیا یاراداردیم
ظلم ائیله مز، عشق اهلینه جانانه، من اولسام
من دوست ایکن، ای گول، منی سالدین نظریندن
تئز وصله یئتردیم، سنه بیگانه من اولسام
واحد، دئمه، بیز گؤرمه‌میشیک باغِ بهشتی
جنت دئیرم آذربایجانانه، من اولسام