منو
ایل تزه لندی!
بایرام یئلی اسدی، گولعزاریم تزه لندی
شادلیق گتیرن خلقه باهاریم تزه لندی
هر ایل بو گونو بایرام ائدیر خلقیمیز آزاد
تاریخلره ثبت الدو، وقاریم تزه لندی
گولشنده آچیب گول، ائله ییر عالمی خوشحال
عشق اهلینه خوش نغمه لی تاریم تزه لندی
قیزلار بورونوب آل قوماشا عشوه، نازایله
کؤنلوم سئوه ن عاشیق، دئیه یاریم تزه لندی
ائللر گئیینیر فخر لباسین بئله گونده
هفت سین دوزولن نقشِ نیگاریم تزه لندی
واحد یازاجاق مملکته، ملتّه تبریک
ایل دؤندو، فلک دوندو، دیاریم تزه لندی