منو
الهام آلاسان!
سئودیگین یارین الیندن توتاسان، جام آلاسان
اؤپه سن لبلرین، او ناز ائده، سن طعم آلاسان
مبتلاسی اولاسان بیر گولو اوزلو گؤزلین
هر سحر کوسدوره سن، کؤنلونو آخشام آلاسان
شاعیرانه، نه سعادتلی گؤزل منظره دیر
باخیب اؤز ایسته دیگین دلبره، بیر کام آلاسان
شؤق لعلی یئتر عشق اهلینه گول چهره لرین
نه گرک ساقی الیندن مئیِ گول فام آلاسان
یا وئریب جان وطن اوغروندا، هنر گوستره سن
یا اولوب عشق اسیری، بئله بیر نام آلاسان
اووچو گورموش قوشو صیّاد چتین لیکه توتار
ساده دل بیر ائله قوش تاپ کی، اونو رام آلاسان
بیر گؤزل وارمی کی، ناز ائیلهمه گیندن باشقا
یئریشیندن، دوروشوندان باخیب الهام آلاسان؟
بسدیر، ای خسته کؤنول، هیجر بلاسین چکدین
سن گرک وصله یئتیب، بیر قدر آرام آلاسان
واحد، انعام ائده جک یاریم اؤز عاشیقلرینه
بلکه بیر لطفه گلیب سن ده بیر انعام آلاسان