باکیدا

واردیر ایندی، گؤزلیم، باشقا ملاحت باکیدا،
گَل ائدک شؤق ایله هریانی سیاحت باکیدا.
گله جک نسله بو تاریخی شرافتدیر کی
گؤروروک اؤزگه صفا، اؤزگه لطافت باکیدا.
بو گؤزل اؤلکه ایشیقلاندیریر هر بیر طرفی
گولور انسان اوزونه نورِسعادت باکیدا.
چیخ تماشایا، خصوصاً خزرین ساحیلینه
باغِ جنت، داها تعریفه نه حاجت باکیدا!
گئت – گئده قالمایاجاق کؤهنه بینالاردان اثر
تیکیلیبدیر یئنی مینلرجه عمارت باکیدا.
هانسی بیر ساحه اولورسا، وطن اوغلانلارینین،
بورجودور، گؤستره هر ایشده مهارت باکیدا.
عصرلردیر، قوجامان قیز قالاسی قالمیشدیر،
گؤستریر خالقا ووقار ایله اقامت باکیدا.
باکی دیر یوردوموزون مرکزی، شرقین قاپیسی،
حاقلیدیر، خالقیمیز ائیلرسه فخارت باکیدا.
داها بوندان بئله اؤز اؤلکه میزین محصولو
ائدهجک خلقه مرامینجا کفایت باکیدا.
صلحه دوغرو نه چتینلیک، نه فلاکت وارایسه،
اونو دفع ائتمگه وار بیزده جسارت باکیدا.
اوگون اولسون کی، بوتون دشمنیمیز خوار اولسون،
ائیلهیک شادلیق ایله گونده ضیافت باکیدا.
واحدم، من ده بو یوردون، بو ائلین شاعیری یم،
آرتیریر ذؤقومو آرتدیقجا طراوت باکیدا .