هر شئیین خریداری گرک!

ای کؤنول، هر کسه اؤز ایسته دیگی یاری گرک
بولبوله اؤز گولو، اؤز سئودیگی گولزاری گرک
یار اوچون عاشیق ائدر ناله نی، بولبول گون اوچون
هر شئیین، دوغرو دئمیشلرکی، خریداری گرک
منی اغیار آییریب سئوگیلی جانانیمدان
من دوشن گونلره تانریم سالا اغیاری گرک
من کی اؤز دلبریمین لاله یاناغین سئویرم
منه دهرین نه صفاسی، نه چمنزاری گرک
منجه، دونیادا طبیعت یئتیرن بیر گؤزلین
زینتی اولماسادا، دوغرو، دوز ایلقاری گرک
تزه سن، گول کیمی ترسن، سنی هر کیمسه سئویر
گؤزلیم، خالقا باهارین یئنی نوباری گرک
همدمین اولسادا گول چهره، او بیر شرط دئییل
همی خاصیتی گؤیچک، همی رفتاری گرک
واحد، ایسترسن ا گر، مجلیسیمیز خوش کئچسین
زولفون(١) (( اورتا سئگاهی))، پاشانین(٢) تاری گرک

١خواننده آدی، ٢تار زن آدی.