منو
دئدیم ـ دئدی
دئدیم: ای غنچه دهن، کؤنلومی قان ائیله میسن
دئدی:بیجا یئره عشقمده فغان ائیله میسن
دئدیم: انصاف ائله، اینجیتمه منی، عاشقینم
دئدی: گئت، سیرّیمی دونیایا عیان ائیله میسن!
دئدیم: آغلاتما منی سرو بویون شؤقونده
دئدی: گؤز یاشینی بیهوده روان ائیله میسن
دئدیم: آخر گؤزلیم، باغ و باهاریم سنسن
دئدی: سن عؤمرونو حسرتله خزان ائیله میسن
دئدیم: آز چکمه‌میشم گؤزلرینین حسرتینی
دئدی:ئوز کؤنلونو یئرسیز نیگران ائیله میسن
دئدیم: عشقینده اسیرم، منه بس خئیری نه دیر؟
دئدی:اوّلده بو سودادا زیان ائیله میسن
دئدیم: عشق آتشی نئیلر منه؟ قورخان دئییلم!
دئدی: بیچاره، یانارسان! نه گمان ائیله میسن؟
دئدیم: ای گول! من ازلدن ده گؤزل عاشقیم!
دئدی: سن روحینی عشق ایله جوان ائیله میسن
دئدیم: هر گون سرِ کویوندا دولانماقدر ایشیم
دئدی: واحد، نه گؤزل یئرده مکان ائیله میسن!