گویا نظردن دوشموشم!

خاکِ پایینا اوماهین دون سحردن دوشموشم
ذرّه رحم ائتمز منه، گویا نظردن دوشموشم
اولموشام مجنونو اول گوندن من اول لیلی وشین
ائیله روسوایه م کی خلق ایچره دگردن دوشموشم
اول هیلال ابرویه دیل آچسام دا، باخماز ناله مه
گوئییا، بیر پاسلی شمشیرم، کسردن دوشموشم
مندن اول سرویم، او گوندن کیم کسیبدر اُلفتین
ائیله بیل کی، بیر نهالم، من ثمردن دوشموشم
رحم قیل، جور ائتمه، آهیمدن یانارسان عاقبت
سانما بیر سؤنموش چیراغم، من اثردن دوشموشم
اولما همدم غئیرله غئیرت هلاک ائیلرمنی
چوخدا پیرم، ای گؤزل، سانما هنردن دوشموشم
صورتِ حالیم گؤروب، ائل کسدی مندن رغبتین
ائیله کیم، اول ماهین عشقیده لکردن(١) دوشموشم
واحد، آذر(٢) خوش دئمیش: اود دور وجودو عاشقین:
((آذرِ عشقم، گمان ائتمه شرردن دوشموشم))

١ قیافه، گورونوش، وضعیت، ٢غزل شاعیری