گؤروشمک آرزوسو!

کؤنول! غم چکمه، یارآچمیش جمالیدن نقاب ایندی
خجالتدن اوزون تورپاغا سورتور آفتاب ایندی
او سروِ نازنینین قامتی سانکه قیامتدر
کی سالمش خاطیرِ احبابه شوقِ انقلاب ایندی
طوافِ کوی جانان قصدین ایتمش عشق ((چاووشی))(١)
بویوزدن ((آذری اوغلو))(٢) اولوبدور فیضیاب ایندی
همیشه اهلِ عشقی ((بی ریالیق))(٣) ((نیکنام))(۴) ائیلر
نولا، عالم قیلیر اهلِ ریادن اجتناب ایندی
امیدِ وصلینه بیر نازنینین ((اعتماد))(۵) ائتدیم
بو ((شیدا))(۶) کؤنلومه هیجرینده ائیلر مین عذاب ایندی
دم اؤرموش یوسیفِ شادی زولئیخای محبتدن
اولور معشوقه سیندن خسته عاشیق کامیاب ایندی
اول آهو گوزلونون گویا که گؤرموش زولفِ پر چینین
قاچیب دشتِ خطاده گیزله نیبدیر مشکِ ناب ایندی
مریدِ بندهٔ پیر موغانم، عشق فیضیندن
نه ایسترسه م، اولور مئیخانه لرده مستجاب ایندی
من اول ساغر پرست و رند و عیاشِ کؤهن سالم
منه حؤرمت قیلیب تعظیم ائدر جامِ شراب ایندی
سیزینله بیز، گؤروشمک آرزوسون چوخدان ائتمیشدیک
داریخما، ((فطرته))(٧) یاز سن ده، واحد، بیر جواب ایندی

١میر مهدی چاوشی، ٢بالاش آذر اوغلو، ٣محمد بی ریا،
۴محمد باقر نیکنام، ۵اعتماد، ۶یحی شیدا، ٧علی فطرت.
بونلار ۵٢-٠٢٣١ ئنجی ایللرده، تبریزده تشکیل تاپیپ
فعالیت گؤ سترمیش مشهور ((شاعیرلر مجلیسی)) نین
تانینمیش شاعیرلری ایدیلر.