منو
اولا بیلمز!
خلقتده سنین تک، گؤزلیم، جان اولا بیلمز!
اخلاقی گؤزل، سئوگیلی جانان اولا بیلمز!
فخر ائیله‌مه سین اؤز گولونه بولبولِ شیدا
بیر گول هله ده سن کیمی خندان اولا بیلمز!
مین لرجه گؤزللر یئتیریر گونده طبیعت
آمّا سنه بنزر گؤزل انسان اولا بیلمز!
یوزلرجه ا گر حُسنونه آدام اولا حئیران
بیر کیمسه منیم تک سنه حئیران اولا بیلمز!
سن تربیه ده، حُسنده بیر باشقا گؤزلسن
رفتارینا، اخلاقینا نقصان اولا بیلمز!
حُریته، انسانلیغا لایق سنی گؤردوم
هر کس سنی سئومشسه، پشیمان اولا بیلمز!
اؤز عاشیقی نین نازایله قان ائیله‌مه کؤنلون
حریت اولان یئرده کؤنول قان اولا بیلمز!
هر خوش گؤرونن کیمسه یه آلدانما حئییف سن
هر خوش گؤرونن کیمسه ده وجدان اولا بیلمز!
بو حُسنله چوخلار سنی ایستر سئوه، ای گول
واحد کیمی عشقینده غزل خوان اولا بیلمز!