منو
هره بیر یانه چکر
زولفونه ناز ایله هردم او پری شانه چکر
کؤنلومو بند ائدیب اول زولفِ پریشانه چکر
گولشنِ حُسنده زولف ایچره قویوب خالِ سیه
کؤنلومون مُرغونو اول دامه طرف دانه چکر
دایم اغیاریم ایله محرم اولوب جانانیم
مبتلا عاشیقی گؤردوکده اوزون یانه چکر
هوسِ زولفو منی چکدی بیابانه طرف
عشقِ لیلی نئجه مجنونو بیابانه چکر!
ائتمه عشق اهلینه بیهوده مذمت، زاهید!
نه قانیرسان، بو بلاکئشلری، آیانه چکر؟
بو قارا گؤزلو گؤزللر منی دیوانه کیمی
زولف زنجیرینه باغلار، هره بیر یانه چکر
آلیر اغیار صفا طرهٔ مشکینیندن
متصل دردینی آنجاق دلِ دیوانه چکر
آتشِ عشق ایله، واحد، یانیرام، من بیلیرم
شمع اوندا اونوکی، هر گئجه پروانه چکر