منو
اؤز کمالیم ایله!
گونشله بحث ائدیرم من بو گول جمالیم ایله
نئجه برابر اولور آی ایکی هیلالیم ایله؟
من ایسته سم، سالارام اهل عشقی زنجیره
کمندِ زولفلریمله، خیال خالیم ایله
بیرآی صفایِ وصالیمدان استفاده ائدن
یوز ائل ده عؤمر ائله سه، فخر ائدر وصالیم ایله
نزاکت اهلی بیلر، وار نه شیوه‌لر منده
اسیردیر منه عالم بو خوش خیصالیم ایله
منی طبیعت ازل گونده نازنین یارادیب
کی، لایقم بو قدر شأنه اؤز کمالیم ایله
منی سئون گرک عشقیمده مین بلا چکسین
کئچیرده خوش گونونو محنت و ملالیم ایله
او باغبان منه لایقدیر، اهل درد اولسون
کی، بسله سین منی تر غنچه تک بو حالیم ایله
منیم دردیمی، واحد، دئیرسن اول شوخه
نه دنسه،من باجارا بیلمه‌دیم او ضالیم ایله؟