باخدیقدا

کؤنوللر قان اولور سنسیز، گولِ حمرایه باخدیقدا
گؤزللر یاد ائدیر خورشیدِ رویون، آیه باخدیقدا
دهانین گرچی، سؤز یوخ، نؤقطهٔ علمِ معمادیر
ولی بو باره ده چوخ شرحی وار معنایه باخدیقدا
گؤزومده طیفل تک اوینار دمادم عکسِ روخسارین
خیالِ عاریضیله هر زامان دریایه باخدیقدا
قیامت ماجراسیندن منی قورخوتما، ای زاهید
قیامتدیر منه اول قامتِ رعنایه باخدیقدا
تاپیلماز دهرده تشخیص ائدن اعلا و ادنانی
هره اؤز فهمینه مغروردور دونیایه باخدیقدا
ا گرگول لبلرین مئی مجلسینده گئچسه خاطیردن
الیمده قان اولور باده م مئیِ مینایه باخدیقدا
فضای عشقده دیوانه لیک دن باشقاشئی یوخدور
بیرر افسانه دیر مجنون ایله لیلایه باخدیقدا
منیم عاشیق لیگیم مجنوندان آرتئق دیر، بیلیر عالم
اونو یاد ائیله مز هر کیم منِ روسوایه باخدیقدا
طبیعتده نه گیزلی سیرّلر وار، ایندی ظاهردیر
قالیر حیرت ده انسان هر بوتِ زیبایه باخدیقدا
سنی گولزار ایچینده گول گؤره رکن یاد ائدر ائللر
منی خاطیرلاییرلار بولبولِ شیدایه باخدیقدا
محبتسیز گؤزل سیز، گون گئچیرمک هئچ نه دیر، واحد
یئنه سئومک، سئویلمک، یاخشیدیر دونیایه باخدیقدا