سسیمی

چال، عاشیق اوخویوم بیر ائل ماهنیسی
عکس ائیله سین ساری تئللر سسیمی
یوُردومون قوجامان بیر بولبولویم
ائشیت سین اؤلکه لر، ائللرسسیمی
((عراق))(١)ی ((راست)) (٢) قیل چال ((شاهناز)) (٣) لا
موغامی باشلاییم ((شور)) (۴) و ((حجاز)) (۵) لا
دونیانی جوشدوروم بو خوش آوازلا
آپارسین هر یانا یئللر سسیمی
قوی سسیم ان اوجا داغلارا یئتسین
هوا دالغانسین، دومانلار گئتسین
دره لر، تپه لر، حرکت ائتسین
اؤیرنسین نهرلر، سئللر، سسیمی
ایچیلسین تویلاردا سرین قیمیزلار
اویناسین بیر یئرده اوغلانلار، قیزلار
تورکمن ائللری، ایگیت قیرقیزلار
قزاخلار، اؤزبکلر دینلر سسیمی
روس. ارمنی. گورجی. جان قارداشیق
تاجیگ. تاتار. بلوروسلار، یوداشیق
بیز هامیمیز، بیریک، بیر وطنداشیق
سسلر اوکرایندا چوللر سسیمی
یالان سوز بیلمرم سؤزوم گئرچکدیر
اؤلکه میز گونشدن شندیر گؤیچکدیر
بوتون یاشیللقدیر، گولدور، چیچکدیر
آلقیشلار بولبوللر، گوللر سسیمی
شاعیرم سؤزومه اویغوندور اؤلکه م
امکچی خلقیمین دوستویام محکم
دوشمن نه ائیلرسه ائتسین، غمی کم
کسه بیلمز خاین اللر سسیمی
بودور دیلیمیزین گؤزل شعاری
صداقتله هر بیر اوغلان. قیز. قاری
سئچیب سئچیلمگه وار اختیاری
سئور آزاد اولان دیللر سسیمی
ظالیملر سئچگیدن بوتون قوولدو
اود توتدو خائنلر، کولو سوورولدو
دشمنین گؤزلری چخیب اووولدو
ظفرلر قوینوندا. بسلر سسیمی
خلقیمیز خوش گونه چخاندان بری
سعادت آدی دیر دیللر ازبری
واحدی اوُنوتماز آذر ائللری
یازاجاق تاریخه ایللر سسیمی

١راست موغامینین اساس شعبه لریندن .
٢مستقل بیر موغام.
٣مستقل بیر موغام و شور موغامیندا بیر شعبه.
۴اصلی موغاملاردان.
۵شور موغامینین اساس شعبه لریندن .