شانه سی مندن!

سن زولفونو آچ، تؤ ک اوزونه، شانه سی مندن
زنجیری نشان وئر منه، دیوانه سی مندن
سن عاشیقی یاندیرماغا، من یانماغا مایل
سن شمعینی گؤستر منه، پروانه سی مندن
زولفون قدری، عاشیق اولان وار سنه، ای گول
سن سؤیله، او مجنونلاری، افسانه سی مندن!
سرمست گؤزون، فتنه لبین، نشئه لی باده
ایچدیرمنه، اول باده نی، پیمانه سی مندن
سن نازایله گل کی، صدفین قیمتی آرتسین
گؤز یاشی کیمی، اینجیسی، دوردانه سی مندن
هردن گؤتور اوزدن، گؤزلیم، افعی ِ زولفون
چک ظاهیره گنجینه نی، ویرانه سی مندن
واحد، مئیی ترک ائتمک اوچون پیرِ مغانین
رنجیده اولوب، بیر نئچه مستانه سی مندن