سئویملی دلبر

بو نازنین گؤزلین یاخشی دلگشالیغی وار
حئیف، اؤز عاشیقینه چوخ کم اعتنالیغی وار
گؤزللیگیله برابر، سئویملی دلبردیر
نه غئیرلرله یاخیندیر، نه آشنالیغی وار
دئمه، گؤزو، قاشیدیر آرتیران ملاحتینی
بولاردان آرتیق هله خالی نین قارالیغی وار
نئجه بو حُسن ایله من اول نیگاره لیلی دئییم
اونون کی، عشقده مجنونا بیوفالیغی وار؟!
گدایِ کویو اولان بؤیله نازنین گؤزلین
دیارِ عشقده دونیایا پادشاهلیغی وار
حقیقت عاشیقی پروانه دیر، گئت، ای بولبول
سنین فغانین، اونون زار و بینوالیغی وار
نه رتبه ایسته مه، واحد، نه شهرت عالمده
او کس کی، رتبه پرست اولدو، بیل گدالیغی وار