منو
جان آلان گؤردوم!
همیشه یارِ بی مهری رقیبه مهربان گؤردوم
وفا ترکین قیلیب، ظلمو گؤزللرده عیان گؤردوم
دولاندیم وادیِ عشق ایچره بیر لیلی سوراغیندا
اؤزوم تک عشقده مجنونِ زاری لامکان گؤردوم
همیشه کج مدار ایله دولانیر چرخِ کج رفتار
جفا و جؤردن عشقلار قدّین کمان گؤردوم
دوشوب سئودای زولفِ یارا اولدومسا خریداری
بو سئودادن منِ بختی قارا دایم زیان گؤردوم
گلیب طوطی کیمی گفتاره، یاریم مهربان اولموش
بحمدالله، منیمله اول گولو شیرین زبان گؤردوم
لبیندن آیری دوشدوکده، نیگارا، قلبِ عشاقی
خیالِ غنجهٔ لعلِ لبیندن خون فشان گؤردوم
جهاندا گؤرمه دیم، واحد، گؤزللردن وفا هرگز
گؤزللر ناز و رفتارین همیشه جان آلان گؤردوم