خوش ترانه دیر

مقصد اوزوندور عاشیقه، جنّت بهانه دیر
لعلین یانیندا چشمهٔ کوثر فسانه دیر
بولبوللرین صداسی توتوب صحنِ گولشنی
بیهوش ائدیب منی، نه گؤزل، خوش ترانه دیر
چکمیش کناره هر کس اؤز ایستکلی دلبرین
گول اوزلولره صحبتیمیز محرمانه دیر
نه خاردان اثر گؤرونور، نه رقیبدن
به-به، نه یاخشی دؤر، نه یاخشی زمانه دیر!
سرمست ائدیب بیزی یئنه بو قارا گؤزلولر
سوزگون باخیشلاری نه گؤزل، شاعیرانه دیر
ایندی تصور ائیله بو باغین گؤزللرین
حال اهلی آنلایار، بو نه رمز و کنایه دیر
واحد، سئوین کی، خالق اوُزو قیمت وئریر سنه
طبع ین گؤهر ساچان نه توکنمز خزانه دیر!