قیل حذر افغانیمدان!

ای یئخان، کؤنلوم ائوین، قیل حذر افغانیمدان
ائوین آباد اولا، ال چک دلِ ویرانیمدان
منی مجنون ایله فرهاده برابر توتما
من اولاردان دا، هنرله گئچرم جانیمدان
بیرجه گَل، گور، نه جفالارچکیرم زولفوندن
خبرین یوخدو سنین حالِ پریشانیمدان
طعن ائدیر ائل منه: ((یارین نه وفاسیز چیخدی؟))
ای وفاسیز، دئمیرم من بونو اؤز یانیمدان
سانکی باشدان – باشا بیرشعلهٔ آهیم گئجه لر
شمعلر، اودلانیر، آهِ دلِ سوزانیمدان
نئیلرم من گولو، یا لاله نی، انصافیم وار
اونلارین هانسی گؤزل دیر رخ جانانیمدان
وطنیمده نئجه من ایسته مه ییم بیر گولو کیم
جانی جانیملا بیر اولسون، قانی دا قانیمدان
واحدم، عصریمیزین ایندیکی فرهادی منم!
کیم منی آیری سالار خسروِ خوبانیمدان؟