فرصت اولاندا

دیندیر منی هردن، گؤزلیم، فرصت اولاندا،
وصلین بیزه بیر آن، نه اولار، قسمت اولاندا؟
باخ، گؤر منی زولفون نه پریشانلیغا سالدی،
بیر گون آچارام دردیمی جمعیّت اولاندا.
یوزلرجه جفا ائتسن، اوُنوتماز سنی کؤنلوم،
فیکریمده سن، ای گول، یئنه هر صحبت اولاندا.
بیگانه ا گر اولماسا، تئز وصله یئتردیک،
کیم خئیر گؤروب، دوشمنی کم فرصت اولاندا؟
زولفون کی، توتوب روُیونو، چوخ قورخورام اوندان
عالم توخونار بیر بیرینه ظلمت اولاندا.
کؤنلوم نئجه سنسیز، گؤزلیم، ناله سیز اولسون
بولبول دایانارمی گولونه حسرت اولاندا؟
واحد، هله قارشیندا بؤیوک بیر گله جک وار
دونیا بیزه لذّت وئره جک جنّت اولاندا!