منو
یادیمدان چیخدی!
دئمه‌دیم دردیمی جانانا، یادیمدان چیخدی
گؤردوم اؤز یاریمی، بیگانه یادیمدان چیخدی
بولبوله گول نه جفا ائیله دیگین بیلدیردیم
یاندی جانیم، یئنه پروانه یادیمدان چیخدی
دئیه جکدیم او قارا زولفه، نه دردیم وارایدی
الدو کؤنلوم ده لی، دیوانه یادیمدان چیخدی
وصلینه مایل اولان گونلری بیرـ بیر سایدیم
یاندیغیم آتش هیجرانه، یادیمدان چیخدی
زولف الیندن نه بلا چکدیگیمی بیلدیردیم
نه قدر فکر ائله دیم، شانه یادیمدان چیخدی
مئی ایچرکن منی بیر لطف ایله دیندیردی او گول
مست اولانلار کیمی پیمانه یادیمدان چیخدی
بلکه، واحد، دئییم اول شوخه، اینانسین سؤزومه
آند ایچیم سئوگییه، وجدانه یادیمدان چیخدی