گیله ائیلر

(( کؤنلوم یئنه جانانین الیندن گیله ائیلر))(١)
بولبول نه جفا چکسه، شیکایت گوله ائیلر
فخر ائیلردیم وصلینه، هیجرانینا یاندیم
طالع نه بیلیم کی، منی آخیر بئله ائیلر؟!
ظالیم فلگین گردشی آتشلره یانسین
اوّلجه نه جؤر ائیله سه، اهلِ دله ائیلر
دیوانه سییم بیر اؤزو گؤیچک، قارا خالین
زولفون منه زنجیر کیمی سلسله ائیلر
بیلسن سنه، ای گول، نه قدر عاشیق اولان وار
تقریباً ا گر سایسان، او مین قافله ائیلر
گر بادِ صبا زولفونه یول تاپسا او شوخون
مین طعنه چمنلرده گئدیب سونبوله ائیلر
واحد، یئنه من حُسنونه حئیرانام او ماهین
رحم ائیله، دئسم، جؤر ائله مه! او، هله ائیلر

١مصرع حئیران خانیمیندیر.