دوستونا بیگانه دئمه!

منی هر کیم کی، سئویر، گل اونا دیوانه دئمه!
آشنا بیلدیگین اؤز دوستونا بیگانه دئمه!
عاشیقین قلبینی گئت پیر قلندردن سور
سن خراباتی اولان منزله ویرانه دئمه!
یانماییب من کیمی پروانه ده عشق آتشینه
اؤزونو هر اودا چیرپان قوُشا پروانه دئمه!
منی سرمست ائله ین گؤزلرینین حسرت دیر
نئشهٔ جام ایله، ای گول، منه مستانه دئمه!
خئیرخواه اول، گؤزلیم، عاشیق بیچاره لره
بی سبب اونلارین حاقیندا بیر افسانه دئمه!
آغزینین سیرّینی صرافه گولرکن سؤیله
قدرسیز هر داشا گؤهر دئمه، دوردانه دئمه!
باشقا جانانلارا هر دردینی، واحد، دیٔ، نه غم
آنجاق اؤز ایسته دیگین سؤ گیلی جانانه دئمه!