منی گؤرن کیمی سن هؤنکورهرک
آچدین قوللارینی...
قوجاقلاشدیق بیز.
بو گۆن قوجاقلاشان قوللاریمیز تک،
نه واخت بیرلشهجک بس وطنیمیز؟
گؤروشدوک، قارداشیم، ایلک دفعه بیزده
آغلادیق هم آشکار، هم خؽسین-خؽسین
سنی گؤرمهمیشدن
اۆرگیمیزده
سهند داغی کیمی سن اوجالیردین.
او قدر اوزاغیق، بو قدر یاخین.
گؤروشدوک...
حسرته سونمو قویولدو؟
آخ!.. یۆز اللی ایللیک اوزون هیجرانین
وۆصالی، آ قارداش، گۆن یاریم اولدو.
دینلهدیک سسینی اؤز کؤنلوموزون،
سۆکوتدا بو دردی بؤلدوک، سئویندیک.
سئوینجین ایچینده آغلادیق او گۆن،
آغلایا-آغلایا گۆلدوک، سئویندیک.
آنابیر، آتابیر قارداش!.. درده باخ،
اؤز حالال ائوینده بیر گۆنلوک قوناق!..
بیز ائله باخیردیق سنه، ائله بیل،
باخیریق مین ایللیک حسرتیمیزه.
ائله بیل دوغماجا ائلیمدن دئییل،
اؤزگه پلانئتدن گلمیسن بیزه.
ائله باخیرام کی، چؤهرهن بۆسبوتون
گۆزگو تک عکس ائدیب کؤنلومه دۆشسون!
اۆزونون خطلری - او قاش، گؤز، تامام
اؤزومه بنزهییر... لاپ دوغماسان سن.
اۆزونده گزدیکجه گؤزوم،
سانیرام
کئچیرم تبریزین کۆچهلریندن...
خودویلا اگلشیب او گۆن دیزبهدیز،
واختی، ساعتلاری دگیشدیردینیز.
سن اونا قاییتدین، او سنه، قارداش،
گؤز یاشی سپیلدی ماسانین اۆسته.
دئییرم، بو دمده نه اولایدی کاش،
زامان دا دونایدی بو آنین اۆسته.
سن آز دانیشدین،
دینیب آلیشدین.
دئدین: - نئیلهییم؟
بۆتؤولوگومه
قؽییرلار منیم.
اؤزومو پارچا،
دیلیمی لهجه
ساییرلار منیم...
آغلایار بو درده داغ دا، اؤروش ده
تاپیلار یئنه ده قؽنایان بیزی.
داها آیدین گؤردوک بیز بو گؤروشده
آمانسیز، گۆمانسیز حسرتیمیزی.
خنجریم بیر یانا، پاس آتیب قؽنی
هارای بو حالیما، هارای، های-هارای!
والله، گؤروشونده آیریلیغینی
گؤرن بدبختلرین حالینا وای-وای!
منی گؤرن کیمی سن هؤنکورهرک
آچدین قوللارینی...
قوجاقلاشدیق بیز.
بو گۆن قوجاقلاشان قوللاریمیز تک
نه واخت بیرلشهجک بس وطنیمیز؟