یول - داغ

آددیملایا-آددیملایا من ایللری،
یول گئدیرم
دوغولدوغوم گۆندن بری.
یول گئدیرم.
پیلله‌لریم ایللر منیم، آیلار منیم.
اؤز مسلکیم، دۆز مسلکیم،
اۆرگیمی
زیروه‌لره هایلار منیم...
یول گئدیرم،
بیلمه‌سم ده،
قارشیداکی آددیملارین سایینی من.
آددیملاریم قوّت آلیر،
خیالیمدا گۆلومسه‌ین سون پیلله‌دن.
منیم یولوم - بیر مسلکین دۆز یولودور،
منیم یولوم - اؤز فیکریمین اؤز یولودور.
مین حیسّیم وار،
مین آرزوم وار.
یولوم بیردیر،
یولوم حاقدیر.
منیم یولوم داغلار آشیب،
زیروه‌لره چاتاجاقدیر.
بیر اورا باخ،
زیروه‌سینده یول وار داغین.
داغ نه قدر اوجا اولسا،
یول اۆستوندن آشار داغین!
یول اوجادیر زیروه‌دن ده...
یورولارمی
اؤز یولونو دۆز گئدن ده؟
ای یولونو، مسلکینی
تئز-تئز هاوا بۆروسونا گیروو وئرن، -
ایقلیم اۆچون دگیشدیرن،
دوغرودان دا، چوخ زیرکسن،
چوخ قوچاقسان.
اونو بیل کی،
یان یولدا قالاجاقسان...
یولو اوتا دگیشدیرن
جؽغیرلاردا ایتر، باتار.
زیروه‌لرین مین عطیرلی چیچگینه یئتیشمه‌میش
یونجالیقدا ال-قول آتار...
یول قاباغا، یول زیروه‌یه!
بو یوللاری یاغیش دؤیه، بوران دؤیه...
بو یوللاردا دۆز یول گئدن اگیلمه‌یه!..
اگیلمه‌یه!..
سون زیروه‌یه گلیب چاتا!..
آلقیش دئدیم بو عؤموره،
بو حیاتا!..
بیر اورا باخ!
زیروه‌سینده یول وار داغین
داغ نه قدر اوجا اولسا،
یول اۆستوندن آشار داغین!