دۆنیادان اود آلیر آرزو دا، کام دا،
کؤنلومون ایچینده نئجه گیزلنیم؟
گؤزوم ده، کؤنلوم ده، قولاقلاریم دا
گئجهلی، گۆندوزلو آختاریر منیم...
نه گئجه تانیییر، نه گۆندوز کؤنول
آختاریر،
آختاریر...
"یئتر!"-دئیممیر.
تاپدیغی اینجینی دویومسوز کؤنول،
بو گۆن بهینسه ده، صاباح بهینمیر.
تاپدیم، اوشاق کیمی سئوینیرم من.
اؤزوم وورولورام سطیرلریمه.
سونرا گؤرورم کی،
تاپدیقلاریمین،
هئچ بیری کؤنلومجه دئییلمیش، دئمه!
ایسترم، همیشه آشیب-داشام من.
گئجهلی-گۆندوزلو آختاریشیمدان
تاپدیغیم لذّتی
تاپدیقلاریمدا
تاپمامیشام من.
گزیب آختاریرام،
گؤردوکلریم چوخ.
مین شعر گیزلنیب هر قاریشیمدا.
یوخ-یوخ!
گؤزللیگی تاپدیغیمدا یوخ،
تاپمیشام ابدی آختاریشیمدا.